Qué voi saber

  • Qué ei intercat?

    Intercat ei un ensemble de recorsi electronics en un entorn web —materiau didactic, documentacion sociolingüistica, informacion sus volontariat lingüistic...— entà introdusir-se ena lengua e cultura catalana, pensat mès que mès entà estudiants de programes de mobilitat que visiten es universitats de Catalonha.

  • Intercat ei gratuït?

    Òc. Es corsi de catalan virtuaus qu'aufrís Intercat son totauments gratuïts, a excepcion dera modalitat amb tutoria der estrument Parla.cat.
  • Pogui hèr es corsi d'Intercat se non sò universitari?

    Òc. Quinsevolhe persona que volgue apréner catalan pòt seguir es corsi d'Intercat. Era plataforma Intercat se creèc preferentaments entàs universitaris estrangèrs que vòlen estudiar en Catalonha, mès qu'ei dubèrta a toti.
  • Pogui hèr corsi presenciaus de catalan enes universitats catalanes sense èster universitari e obtier eth certificat oficiau?

    Òc. Era majoritat d’universitats catalanes aufrissen corsi presenciaus de catalan e autregen certificats equivalenti as oficiaus, encara que non estúdies ena universitat. Consulta era aufèrta ena seccion Qu'apreni catalan dera plataforma Intercat.

    Es certificats qu'obtieràs se seguisses aguesti corsi presenciaus les expedissen es universitats catalanes, son tramitadi pera Comission Interuniversitària de Formacion en Lengua Catalana (CIFOLC) e son omologadi pera Direccion Generau de Politica Lingüistica dera Generalitat de Catalonha.

  • Se seguisqui bèth cors de catalan en Intercat, obtierè eth certificat oficiau de coneishença de lengua catalana?

    Es vies entà arténher es certificats oficiaus de catalan les trobaràs detalhades ena seccion Qu'apreni catalan d'Intercat.

  • Pogui apréner catalan peth mèn compde e dempús examinar-me entà arténher eth certificat oficiau?

    Òc. Era Direccion Generau de Politica Lingüistica convòque cada an es pròves entà acreditar es coneishences de lengua catalana mejançant ua resolucion que se publique en Jornau Oficiau dera Generalitat de Catalonha (DOGC), abituauments abans de fin de gèr.

    S'i pòt presentar quinsevolhee persona qu'age setze ans o mès en moment der examen, de quinsevolhee nacionalitat, ath marge des estudis qu'age corsat prèviaments.

  • A on pogui arténher modèls des examens oficiaus de catalan?

    Pòs arténher modèls d'examens oficiaus e informacion detalhada sus es tramits entà inscríuer-te as pròves que convòque era Direccion Generau de Politica Lingüistica ena web Lengua catalana.

    Tanben trobaràs modèls d'examens ena web dera Comission Interuniversitària de Formacion en Lengua Catalana (CIFOLC), en apartat dedicat as certificats dera CIFOLC.

  • Es estudis qu'è corsat en Catalunya (títols, diplòmes, certificats...) equivalen a bèth nivèu oficial de coneishença de lengua catalana?

    Entà saber s'es tòns estudis equivalen a bèth un des certificats oficiaus de catalan, te cau consultar era lista de Titolacions equivalentes as certificats de coneishences de catalan dera Direccion Generau de Politica Lingüistica.
  • Viui dehòra de Catalonha e voi apréner catalan. A on pogui anar?

    Ath delà d'utilizar es estruments virtuaus d'Intercat, pòs seguir corsi de catalan presenciaus en fòrça universitats d'arreu deth mon. Er Institut Ramon Llull, qu'ei er organisme encargat de difóner era lengua e era cultura catalanes ar exterior, n'a tota era informacion.
  • Viui dehòra de Catalonha e voi examinar-me de catalan entà trèir-me eth certificat oficiau. A on pogui anar?

    Er Institut Ramon Llull convòque periodicaments pròves de sufisença en diuèrses ciutats deth mon entà obtier es certificats internacionaus de catalan. Es pròves son de diferenti nivèus.

    Se vòs mès informacion, accedís ath web der Institut Ramon Llull.

  • Voi apréner catalan e m‘agradarie practicar-lo damb gent deth país. Pogui participar en bèth programa d'escambi lingüistic? Pogui hè'c se non estúdii ena universitat?

    Òc. En cas que non sigues universitari, pòs participar en programa Volontariat pera lengua qu'organize era Direccion Generau de Politica Lingüistica, coma aprenent.

    S'ès universitari, corses o as cursat bèth estudi en quinsevolhe des universitats catalanes, tanben pòs participar enes diferents actuacions d'escambi o volontariat lingüistic qu'organize cada universitat.

  • Sò catalanoparlant e m'agradarie participar en bèra activitat entà fomentar eth catalan entre es nauvenguts. Com m'ac cau hèr? Pogui participar-i se non estúdii ena universitat?

    Òc. En cas que non sigues universitari, pòs participar en programa Volontariat pera lengua qu'organize era Direccion Generau de Politica Lingüistica.

    S'ès universitari, hès o as hèt bèth estudi en quinsevolhe des universitats catalanes, tanben pòs participar enes diferentes actuacions de volontariat lingüistic qu'organize cada universitat.